អូស្រ្តាលី៖ នៅថ្ងៃសុក្រ ទី០៩ ខែធ្នូនេះ ប៉ូលិសអូស្រ្តាលីបានធ្វើការចោទប្រកាន់ទៅជនជាតិចិនចំនួន ៤នាក់ ជុំវិញករណីបោកប្រាស់លើការវិនិយាគតាមប្រព័ន្ធអនឡាញដែលកើតឡើងនៅសហរដ្ឋអាមេរិក ដែលអាជ្ញាធរបានបញ្ជាក់ថា ការបោកប្រាស់នេះមានទំហំទឹកប្រាក់ប្រមាណជា ១០០លានដុល្លារពីទីកន្លែងនានាជុំវិញពិភពលោក។

ប៉ូលីសសហព័ន្ធអូស្ត្រាលី (AFP) បាននិយាយថា ការបោកប្រាស់ដ៏ស្មុគស្មាញនេះពាក់ព័ន្ធនឹងការរៀបចំវេទិកាពាណិជ្ជកម្មអេឡិចត្រូនិកស្របច្បាប់ ដែលមានអាជ្ញាប័ណ្ណដល់ឈ្មួញកណ្តាលប្តូរប្រាក់បរទេស (Broker) តាមរយៈការផ្តល់នូវកម្មវិធី Software ទៅកាន់អ្នករងគ្រោះ។ ប្រភពដដែលបានបន្តថា កាលពីខែសីហាកន្លងទៅ ភ្នាក់ងារសម្ងាត់សហរដ្ឋអាមេរិក បានជូនដំណឹងដល់អាជ្ញាធរអំពីទំនាក់ទំនងរបស់អូស្ត្រាលីទៅនឹងការបោកប្រាស់ដែលមានមូលដ្ឋាននៅសហរដ្ឋអាមេរិក។ បើតាមភ្នាក់ងារសម្ងាត់សហរដ្ឋអាមេរិក ជនសង្ស័យក្នុងករណីនេះភាគច្រើនរស់នៅទីក្រុងស៊ីដនី ខណៈជនរងគ្រោះជាច្រើនជាអ្នករស់នៅសហរដ្ឋអាមេរិក។ 

ក្រៅពីការស៊ើបអង្កេតករណីពាក់ព័ន្ធនឹងជនរងគ្រោះនៅសហរដ្ឋអាមេរិក អាជ្ញាធរអូស្រ្តាលីក៏បានស៊ើបអង្កេតលទ្ធភាពនៃជនរងគ្រោះក្នុងប្រទេសអូស្រ្តាលីផងដែរ។

ក្រុមឧក្រិដ្ឋកម្មបោកប្រាស់ទាំងនេះបានរៀបចំផែនការយ៉ាងល្អិតល្អន់ ដោយប្រើប្រាស់វេទិកាសង្គមយ៉ាងចម្រុះ រួមមានកម្មវិធីផ្ញើសារ កម្មវិធីណាត់ជួប និងកម្មវិធីផ្តល់ឱកាសការងារ មុននឹងធ្វើការណែនាំអំពីការវិនិយោគបោកប្រាស់តាមអនឡាញរបស់ពួកគេទៅកាន់ជនរងគ្រោះ។ ក្រោយមកក្រុមជនរងគ្រោះក៏បានក្លាយជាអ្នករងគ្រោះដោយមិនដឹងខ្លួនតាមរយៈការចូលក្នុងកម្មវិធីវិនិយោគរូបិយបណ្ណបរទេស និងរូបិយបណ្ណគ្រីបតូជាដើម។ ក្រោយមក អ្នកចូលរួមត្រូវបានជំរុញឱ្យដាក់ប្រាក់ម្តងហើយម្តងទៀត ដោយមិននិយាយពីលុយដែលត្រូវបានគេបោកប្រាស់បាត់នោះឡើយ។ 

ប៉ូលិសអូស្រ្តាលីក្រោយការស៊ើបអង្កេតបានលើកឡើងថា ជនឆបោកទាំងបួននាក់នេះថែមទាំងបានបង្កើតក្រុមហ៊ុនដែលចុះឈ្មោះនៅអូស្រ្តាលីទៀតផង ដើម្បីឱ្យជនរងគ្រោះក្នុងការវិនិយោគកាន់តែជឿជាក់ ព្រមទាំងបានបង្កើតគណនីនៅធនាគារធុរកិច្ចអូស្រ្តាលីផងដែរ ដើម្បីសំអាតប្រាក់ក្រោយពីបញ្ចប់ប្រតិបត្តិការរបស់គេ៕